Føroyskur jarðfrøðingur í vísindatoymi hjá NASA

Uni Árting, sum starvast hjá Jarðfeingi, er vorðin partur av vísindatoymi hjá amerikanska rúmdarstovninum, NASA. 

Tað boðar Jarðfeingi frá á heimasíðuni. Uni Árting er jarðfrøðingur og granskari.

Sum liður í at arbeiða við dátunum frá rovaranum, Perserverance, sum koyrir á Mars, hevur vísindatoymið hjá NASA biðið Una Áring um at gerast limur.

Tá leitað var eftir støðum at royna tól, sum skuldu nýtast til at seta á rovaran, Perserverance, fall valið á Føroyar, tí jarðfrøðin var mett at vera lík henni á Mars.

Meinlík føroysku jarðfrøðini

Soleiðis gjørdist Uni Árting, sum er serfrøðingur í føroyskari jarðfrøði, partur av arbeiðinum í Føroyum, har tólini, sum í løtuni verða nýtt til at lýsa jarðfrøðina á Mars, vóru kalibrerað. 

Uni Árting var biðin um at gerast partur av toyminum hjá NASA, tá Perserverance kom á Mars, og tað vísti seg, at jarðfrøðin var meinlík tí føroysku.

- Enn er hetta nýtt, men eg havi altíð havt áhuga fyri jarðfrøði, sólskipanini og gongustjørnunum, og tí er tað heilt vist ein dreymur at arbeiða ítøkiliga við rúmdargransking, sigur Uni Árting millum annað við heimasíðuna hjá Jarðfeingi.