Landsrætturin herdi revsing fyri tríggjar harðskapstilburðir

Ein 19 ára gamal maður var í Eystara Landsrætti í gjár dømdur fimm mánaða fongsulsrevsing fyri tríggjar harðskapstilburðir, sum vóru framdir í tíðarskeiðnum frá mars til juni í ár. 

Revsingin er lutvíst treytaleys, og maðurin skal tí inn at sita í tveir mánaðir. Tríggir mánaðir eru treytaðir, við m.a. kravi um samfelagstænastu.

Maðurin var fyrr í ár dømdur í Føroya Rætti. Har var hann dømdur fýra mánaða fongsulsrevsing, harav ein mánaður var treytaleysur.

Í landsrættin

Av tí at maðurin var dømdur fyri tríggjar harðskapstilburðir, har tann eini var fevndur av grein 245 í revsilógini um grovan harðskap, skeyt ákæruvaldið dómin inn fyri landsrættin við kravi um, at revsingin skuldi herðast.

Í gjár var málið fyri í Eystara Landsrætti, sum tók undir við ákæruvaldinum, at revsingin skuldi herðast. 

Rætturin legði m.a. dent á, at tann dømdi hevði framt harðskap tríggjar ferðir í eitt stutt tíðarskeið, skrivar løgreglan í tíðindaskrivi.