Fleiri ukrainsk flóttafólk

Roknast kann við, at ukrainsk flóttafólk í stórum tali fara at leita sær friðskjól í øðrum londum, nú vetrarkuldin ger alsamt meira um seg.

Tað heldur týski sendiharrin í Bretlandi, Miguel Berger.

- Vit kunnu rokna við eini flóttafólkabylgju tær næstu vikurnar, sigur Berger og vísir á russisku atsóknirnar at orkuverkum í Ukraina sum fremstu orsøk til fleiri ukrainsk flóttafólk.

Kring meginpartin av Ukraina er nú kavi og frost, samstundis sum fleiri húsarhald ongan hita hava.

Tøl frá ST vísa, at síðani Russland leyp á Ukraina í februar mánaði, eru átta milliónir ukrainar rýmdir heimanífrá sum flóttafólk.