Fáa lønarhækking fyri dýra biðidag

Danska stjórnin ætlar, at dýri biðidagur, sum hevur verið hildin síðani 1686, verður tikin av næsta ár. Í hesum sambandi kunnu mánaðarlønt vænta lønarhækking upp á 0,45 prosent.

Hetta stendur í lógaruppskotinum, sum stjórnin hevur sent til hoyringar um dýra biðidag.

Sambært danska arbeiðsmálaráðharranum, Ane Halsboe-Jørgensen, er tað umráðandi fyri stjórnina, at lønin verður ein partur av uppskotinum. Tað sigur hon við danska kringvarpið.

- Fólk skulu hava løn fyri hendan arbeiðsdagin, og tað tryggja vit við hesi lógini, sigur hon.

Tað hevur annars verið stór mótstøða í Danmark at strika dýra biðidag sum halgidag.