Finska psykiatriin av kósini

Ein kanning vísir, at meirilutin av teimum, ið fáa fíggjarligan stuðul frá tí almenna til psykiatriska hjálp, eru fólk við høgari útbúgving og kvinnur.

Finska útgávan av Sinnisbata, Mieli, sigur hetta vera eina ábending um, at psykiatriska hjálpin er farin av kósini.

- Fíggjarligi stuðulin er nú mest bara ein inntøkuhækking hjá teimum, sum frammanundan eru fíggjarliga væl fyri, sigur Kristian Wahlbeck frá Mieli við finska kringvarpið, YLE.

Samstundis fáa hvørki pensjónistar ella tey, sum ikki eru tøk á arbeiðsmarknaðinum, fíggjarligan stuðul til psykiatriska hjálp.

Eisini verður víst á, at sjúklingurin sjálvur skal rinda 260 krónur fyri hvørja viðtalu, og tað gagnar heldur ikki teimum, ið ongan stuðul fáa til viðgerðina.