Kekkiskur landsliðsspælari boðar frá, at hann er samkyndur

Kekkiski landsliðsspælarin í fótbólti, Jakub Jankto, sigur í videobroti á twitter, at hann er samkyndur.

Miðvallarin, sum í løtuni spælir við Sparta Prag, telist millum kendastu spælararnar, sum higartil alment hava sagt seg vera samkyndar.

27 ára gamli miðvallarin hevur spælt 47 landsdystir og hevur umboðað bæði Sampdoria og Udinese. 

 - Sum øll onnur, vil eg liva frælsur, uttan ótta, uttan fordómar, uttan harðskap, men við kærleika. Eg eri samkyndur, og eg vil ikki krógva meg longur, sigur Jakub Jankto millum annað á twitter.

 - Hetta er ikki undirhald. Endamálið við hesum brotinum er at hjálpa øðrum á leið, sigur 27 ára gamli landsliðsspælarin.

Sparta Prag skrivar á twitter, at Jakub Jankto fyri tíð síðan hevur tosað við leiðsluna, liðfelagarni og venjarar í felagnum um sína kynsligu sannføring.

Hetta handir stutt eftir at avstralski spælarin, Josh Cavallo, og enski Blackpool-spælarin, Jake Daniels, alment boðaðu frá, at teir eru samkyndir.