FarCargo fær annað flogfar

Hóast farmafelagið hjá Bakkafrosti, ið kallast FarCargo, í august í fjør skrivaði undir keypssáttmála um eitt farmaflogfar til flutning av alilaksi, er einki flogfar komið enn.

Ætlanin var, at flogfarið skuldi koma til Føroya í desember í fjør, men fyrst var tað seinkað, og nú er tað so skift út við eitt annað flogfar.

- Vit hava slept ætlanini við fyrra flogfarinum og fáa okkum eitt munandi nýggjari flogfar til farmaflúgvingina í staðin, sigur Regin Jacobsen, stjóri í Bakkafrosti.

Skal flúgva alilaks

- Hetta hevur verið ein tungur burður, tí ymiskir trupulleikar hava verið, men vónandi fer tað at hepnast hjá okkum við hesum flogfarinum.

Regin Jacobsen vil ikki siga so nógv júst nú, men sum skilst, er talan um eitt flogfar av sama slagi sum tað fyrra, men hetta, sum stendur yviri í USA, er nógv nýggjari.

Enn sum áður er ætlanin, at flogfarið skal flúgva alilaks úr Føroyum til USA og síðani bjóða flogfarmatænastur á heimferðini til Føroya um Danmark.