Sonni Larsen takkar fyri seg

Sonni Larsen takkar fyri seg sum venjari hjá føroyska hondbóltslandsliðnum við kvinnum, skrivar Hondbóltssambandið á facebook.

Hann hevur fingið nýtt starv hjá mansliðnum Viking TIF í Bergen í Noreg.

Landsliðið við kvinnum venur saman hesa vikuna, og ítróttastjórin hjá HSF, Mark Lausen-Marcher, skal taka sær av liðnum saman við hjálparvenjaranum, Finni Hansson, til nýggjur venjari er funnin. Venjingardystir ímóti Finnlandi eru á skránni í apríl.

Hetta er aðru ferð, at Sonni Larsen fer úr landsliðsvenjarastarvi í Føroyum. Hann var venjari hjá monnum í tíðarskeiðnum 2017-2021. 

 - Eg eri keddur av, at eg ikki kann fullføra uppgávurnar, og skilligt vil HSF geva pláss (til nýggjan venjara, red.) beinanvegin, sigur Sonni Larsen sambært HSF. 

Samstarv verður kortini millum Hondbóltssambandið og Sonni Larsen, sum undirvísir á úrvalsvenjaraútbúgvingini.