Eftirmeting um Málráðið kemur ikki í løgtingið

Eftirmetingin um Málráðið frá 2016 verður ikki løgd fyri løgtingið.

Hon er ikki tíðarhóskandi longur.

Ein nýggj frágreiðing kemur so skjótt, sum til ber, væntandi í summar ella í heyst.

Tað sigur Sirið Stenberg, landsstýriskvinna, sum hevur svarað spurningi frá Johan Dahl, tingmanni, um Málráðið.

Johan Dahl

Johan Dahl, løgtingsmaður, spurdi um Málráðið. (Mynd: Bjarni Árting Rubeksen)

Ætlanin er at gera eina frágreiðing sambært lóg um málráð. Frágreiðingin skal siga, um lógin virkar eftir ætlan.

Kannast skal eisini, um til ber at áseta reglur um Málráð, Staðarnavnanevnd og Navnanevnd í somu lóg, sigur Sirið Stenberg í svarinum. 

Hon fer saman við Málráðnum at gera tíðarætlan, og væntandi byrjar arbeiðið tíðliga í vár.

Sirið Stenberg

Sirið Stenberg, landsstýriskvinna í mentamálum.

Lógin frá 2012 um málráð sigur, at landstýrisfólkið, tá lógin hevur virkað í trý ár, skal leggja frágreiðing fyri løgtingið, um lógin virkar eftir ætlan, og kanna, um til ber at áseta reglur um Málráð, Staðarnavnanevnd og Navnanevnd í somu lóg.

Enn er eingin slík frágreiðing komin í løgtingið, hóast lógin nú er meira enn tíggju ára gomul.

Frágreiðingin, sum var gjørd í 2016, kemur ikki í løgtingið.