Eysturgrønland er avbyrgt

Hetta er niðurstøðan í eini phd-ritgerð, sum byggir á gransking í Eysturgrønlandi, skrivar grønlendska kringvarpið, KNR.

– Tí eiga politikararnir at rakna við og alt fyri eitt taka støðu til, um Eysturgrønland skal skipast sum egin kommuna.

Tað sigur Lars Poulsen, sum situr í grønlendska landstinginum og sjálvur er úr Kulusuk.

– Eg havi í fleiri ár hugsa um støðuna hjá Eysturgrønlandi í kommununi og viðurskiftini í kommununi í dag, sigur hann.

Sett til síðis
Ulunnguaq Markussen, sum hevur skrivað phd-ritgerðina, hevur tosað við fleiri eysturgrønlendingar, sum siga, at hóast teir eru í somu kommunu sum høvuðsstaðurin, Nuuk, so hava teir hvørki havt somu menning ella sama arbeiðsmarknað síðani kommunusamanleggingina í 2009.

Elise Uupi Kuitse, sum býr í Tasiilaq, sigur, at har hevur einki byggivirksemi verið í fleiri ár og tí heldur ikki fleiri arbeiðspláss.

– Vit kenna okkum sett til síðis, tí hóast mong ongan bústað hava, verða eingir nýggir bygdir. eg eri vís í, at vit høvdu havt minni arbeiðsloysi, um fleiri bústaðir vóru tøkir, sigur hon.