Turkaland góðkennir nú finskan Nato-limaskap

Turkiski forsetin, Recep Tayyip Erdogan, sigur nú alment, at Finnland kann gerast limur í Nato.

Tað upplýsti hann á tíðindafundi í dag saman við finska forsetanum, Sauli Niinistö, sum hevur verið á vitjan í Turkalandi.

Erdogan sigur, at turkiska tingið fer nú at góðkenna finsku umsóknina um limaskap í Nato, og hann væntar, at málið verður avgreitt í mai.

Spurningurin um Nato-limaskapin hevur staðið ovast á breddanum fyri vitjanini hjá finska forsetanum í Turkalandi.

Enn er ógreitt, nær ella um Turkaland fer at góðkenna svensku umsóknina um limaskap.

Higartil hevur eisini verið ógreitt, um Ungarn fer at atkvøða fyri finskum limaskapi í Nato, men í dag frættist, at ungarska tjóðartingið fer at atkvøða um bæði finsku og svensku umbønina 27. mars.