Finnland vil hava Svøríki við

Sauli Niinistö takkaði turkiska starvsbróðuri sínum, Recep Tayyip Erdogan, á tíðindafundi í gjár, eftir at Turkaland hevði sagt seg taka undir við, at Finnland fær limaskap í NATO.

Men finski forsetin var ikki bara takksamur, men valdi eisini at peika á løgnu støðuna, at Finnland kann fáa limaskap og Svøríki ikki:

- Finski NATO-limaskapurin er ikki fullfíggjaður, uttan at Svøríki eisini er við, segði Niinistö.

Spurdur, hvør munur er á Finnlandi og Svøríki, tá ið talan er um NATO-limaskapin, var turkiski forsetin hinvegin sera bersøgin:

- Svøríki tekur við opnum ørmum ímóti yvirgangsfólki, og vit síggja í heilum felagsskapir sum PKK og YPG mótmæla á gøtunum í Stockholm, segði Erdogan.