ICC: Vit fáa óivað tikið Putin

At fáa russiska forsetan, Vladimir Putin, at vera til staðar í einum møguligum rættarmáli í altjóða krígsbrotsmannadómstólinum í Haag, er tann stóra avbjóðingin, nú ICC í gjár gav boð um, at Putin skal handtakast.

Men høvuðsákærin í ICC, Karim Kahn, heldur tað avgjørt vera gjørligt.

Hann vísir til støðuna í Nazi-Týsklandi og gamla Jugoslavia, har landsins leiðarar at enda kundu verða dømdir fyri tey krígsbrotsverk, teir høvdu gjørt.

- Teir høvdu allir stórt vald, men hóast hetta, endaðu teir í rættarsalinum, sigur høvuðsákærin við amerikansku sjónvarpsstøðina, CNN.