ST verjir kvinnurættindi

Eftir at hava tingast í yvir 90 tímar, er kvinnunevndin hjá ST komin ásamt um fleiri tilmæli at geva limalondunum, tá ið tað snýr seg um javnstøðu.

- Eg eri errin av okkara fólkum, sum nátt og dag hava stríðst fyri at fáa eitt gott úrslit, sigur norski mentanar- og javnrættindaráðharrin, Anette Trettebergstuen, við NRK.

Norsku umboðini, ið koma frá bæði myndugleikum, sivil-samfelagnum og vinnulívinum, hava staðið á odda fyri tingingunum.

- Vit hava rokkið einum úrsliti, ið verjir javnstøðu og mannarættindi hjá kvinnum og gentum, og millum annað fingu vit undirtøku fyri tiltøkum, ið forða fyri, at harðskapur verður lagdur til rættis um internetið, sigur hon.

Hetta er fyrstu ferð, at limalondini í ST eru vorðin samd um at betra javnstøðu fyri kvinnur í einum talgildum heimi.