Kappingarneyti keypir Credit Suisse

Kappingarneytin, UBS, hevur keypt sveisiska bankan, Credit Suisse, fyri tríggjar milliardir sveisarafrankar, ella 22,7 milliardir krónur í okkara peningi.

Samstundis er greitt, at nógvir íleggjarar í Credit Suisse missa trísifraða milliardaupphædd.

Fíggjarmyndugleikarnir í Sveis hava sett sum treyt fyri bankakeypinum, at Credit Suisse niðurskrivar virðið á øllum AT1-virðisbrøvum til null.

Credit Suisse, banki í Sveis

AT1-virðisbrøvini komu eftir fíggjarkreppuna í 2008. Endamálið var at geva bankum amboð at leggja íløgur um til eginogn, um bankin kom í trupulleikar.

Í hesum førinum verða umleið 16 milliardir sveisarafrankar, ella 121 milliardir krónur, skrivað niður til null.