Tríggir ávirkaðir bilførarar

Í gjárkvøldið var eitt lítið ferðsluóhapp við Hotel Brandan í Havn, har ein bilur rendi á bilin frammanfyri. Eingin fólkaskaði stóðst av hendingini, men nakað av materiellum skaða var. Førarin av bilinum, sum rendi á, kann vænta sær eina bót og eitt klipp í koyrikortið fyri ikki at hava hildið neyðugu frástøðuna.

Í nátt hevur politiið í trimum førum havt fatur á bilførarum, sum vóru undir illgruna fyri at koyra bil, meðan teir vóru ávirkaðir – eina ferð í Havn og tvær ferðir í Hoyvík. 

Í tí eina førinum var illgruni um rúsdrekkakoyring, og í hinum báðum førunum var illgruni um, at rúsdrekka og/ella onnur rúsevni ella heilivágur var uppií. Blóðroynd er tikin av øllum trimum bilførarunum, verður sagt av politistøðini.