KÍ stóð styrkisroyndina

Við tveymálssigri stóð KÍ styrkisroyndina á heimavølli ímóti Víkingi, og klaksvíkingar hava framvegis fult stigatal.

Claes Kronberg og Luc Kassi skutu málini í seinna hálvleiki, tá KÍ hevði greiða yvirvág. Atli Gregersen spældi sín dyst nummar 500 fyri GÍ og Víking, men jubilarurin varð sendur av vølli seks minuttir fyri leiklok, tí hann hevði sagt ov nógv við dómararnar.

HB, sum roynir at fylgja við oddaliðnum, gjørdi sína skyldu við 4-1 sigri á ÍF í Gundadali. HB kom framum við sjálvmálið, men Gundur Petersen javnaði. Beint fyri steðgin skoraði Mads Borchers, og í seinna hálvleiki økti Adrian Justinussen við brotssparki, áðrenn Mads Borchers aftur var síðstur á.

Gamli AB-maðurin, Bjarki Nielsen, var væl upplagdur fyri B36 inni í Vika, og við einum máli og einum uppleggi átti hann stóran part av sigrinum á AB. Hann skoraði sjálvur til 1-0 fyri steðgin, og í seinna hálvleiki var tað Aron Knudsen, sum tryggjaði B36 sín fjórða sigur higartil.


TB vann við Stórá

Mikukvøldið fekk TB sítt fyrsta stig, tá tað eydnaðist at spæla málleysan javnleiki ímóti HB, og í dag var uppaftur betri við Stórá. John Villi Wøldike legði heimaliðið á odda fyri steðgin, men tá bert átta minuttir vóru eftir at spæla javnaði innskifti Jasper Van Der Heyden. Jens Erik Bruhn vildi kortini ikki sættast við enn ein javnleik, og hann skoraði sigursmálið fýra minuttir inni í yvirtíðini.

B68 tók ímóti EB/Streymi á Svangaskarði, har tað endaði við málleysum javnleiki. Bæði liðini høvdu kjansir, men ongin tók av. Heimaliðið endaði dystin við 10 monnum, tí Ragnar Samuelsen var útvístur seint í dystinum.