Føroyar fingu bæði Svøríki og Ísland

Føroyar skal royna seg ímóti bæði Svøríki og Íslandi í EM-undankappingini, sum byrjar í heyst.

Fjórða liðið, sum bestu føroysku hondbóltskvinnurnar skulu spæla ímóti er Luksemborg. Tað er greitt eftir lutakastið, sum var fyri løtu síðani.

 - Lutakastið sær fínt út. Vit hava møtt Svøríki fyrr. Møguliga vóru tær ov sterkar tá, men liðið er broytt nakað síðan, so tað verður spennandi at møta teimum aftur. Luksemborg kenni eg ikki eins væl, men síggi fram til avbjóðingina, sigur Turið Arge Samuelsen. 

 - Íslandi hava vit møtt fyri kortum. Teirra spæl minnur nógv um okkara, tó við eitt sindur hægri leikferð. Tað mugu vit royna at eftirlíkna fyri at fáa stig. Okkara møguleikar eru góðir. Av øllum londum, eru hatta lond sum vit kenna til og hava møguleika at taka stig frá, sigur royndi landsliðsvongurin.

Føroyar vóru í triðja styrkisbólki. Svøríki kom úr styrkisbólki 1, Ísland kom úr næstbesta bólkinum, meðan Luksemborg er mett at vera veikasta liðið í bólkinum hjá Føroyum.

Í oktober í fjør spældi landsliðið við kvinnum tveir venjingardystir ímóti Íslandi. Teir endaðu við 22-27 og 23-28 tapið. Í 2018 spældu Føroyar tveir dystir ímóti Svøríki. Ta ferðina var munurin stórur. 32-13 og 15-33 endaðu dystirnir.

Fyrstu dystirnir verða spældir 11. og 12. oktober.

Bólkur 7:
1. Svøríki
2. Ísland
3. FØROYAR
4. Luksemborg

foroyar_hondbolturok.jpg

Frítekst tagging: 

Ítróttur

Hondbóltur

Føroyar