Kunningarátak skal forða flóttafólki at koma til Svøríkis

Svenska stjórnin er farin undir altjóða kunningarátak, sum skal  forða fyri, at flóttafólk koma til Svøríkis. 

Tað skrivar Expressen.

Maria Malmer Stenergard, migratiónsráðharri, segði á tíðindafundi í gjár, at broyttar mannagongdir verða gjørdar í flóttafólkapolitikkinum.

- Vit hava sæð stórar trupulleikar við integrering, sum ávirka alt svenska samfelagið, sundurskiljing, arbeiðsloysi og tørv á trygd, segði Stenergard.

flóttafólk, Rødby, flóttafólk í Danmark

Nógv flóttafólk eru komin til Evropa seinastu árini. Nú seta svenskir myndugleikar tiltøk í verk at forða flóttafólki at koma til landið. (Savnsmynd)

163.000 fólk komu i 2015

Kunningarátakið verður skipað saman við stuðulsflokkinum hjá stjórnini, Svøríkisdemokratunum, og snýr seg um at broyta myndina av Svøríki sum eitt stuðulsland.

- Fólk eru ofta væl kunnað, og tað er ein orsøk fyri at 163.000 fólk ferðaðust gjøgnum alt Evropa til lítla kalda Svøríki í norði í 2015. Tað var, tí tey vistu, at har eru linari reglur, segði Maria Malmer Stenergard, migratiónsráðharri, um altjóða átakið. 

Á tíðindafundinum kunnaði hon um átakið, sum eisini fevnir um kunning í útlendskum miðlum og á heimasíðum.