H71-kvinnurnar tóku greipuna

Sostatt gjørdist hetta endin á einum framúr góðum kappingarári hjá H71-kvinnunum, sum nú standa eftir við greipuni, tí tær í kvøld hava vunnið føroyameistaraheitið aftur at steypasigrinum, tær vunnu í februar, umframt at tær undan kappingini vunnu dystin um Lionsbikarið.

Bæði í FM-finalunum og steypafinaluni var tað Kyndil, ið var avbjóðarin, og hetta hava eisini verið tey bestu liðini í vetur. H71 hevur, umframt heimligu avrikini, gjørt um seg í EHF Europa Cup-kappingini annað árið á rað. 

H71 vann tær báðar fyrru FM-finalurnar sannførandi, men í kvøld legði Kyndil til brots við øgiligari ferð og var eitt skifti í fyrra hálvleiki á odda við sjey málum.

Men H71 tók sær um reiggj og fekk ruddað stóra munin burtur, men slapp tó ikki av við Kyndil, ið fylgdi við allan vegin. H71 vann tó at enda við einum máli, 25-24, og so var meistaraheitið annað árið á rað veruleiki.