Annika fer til Norra at spæla

Fyrrverandi H71-málverjin skifti fyri einum góðum ári síðani frá íslendsku Haukum til danska Nykøbing Falster í bestu donsku deildini, men fer nú víðari á yrkisleiðini.

Upprunaliga gjørdi Annika Fríðheim Petersen ein trý ára sáttmála við danska felagið, ið var til á sumri í 2024.

Men við heimasíðuna hjá Nykøbing Falster sigur hon, at hon nú skiftir til norskan hondbólt, tí hon hevur brúk fyri at fáa meira spælitíð.

Fyrst til Final Four

- So kann eg eisini taka tær royndir við mær, sum eg havi fingið her, tí eg havi brúk fyri einum størri leikluti og at kunna gera ein størri mun, sigur hon.

Einki verður sagt um, hvat norskt felag, talan er um, men tað verður helst kunngjørt í vikuni, sum kemur.

Men áðrenn eitt nýtt ævintýr byrjar í Norra, skal Annika Fríðheim Petersen fyrst gera seg lidna í Nykøbing Falster.

Liðið hevur góðan møguleika fyri at spæla finalur um danska meistaraheitið, og um vikuskiftið skal Nykøbing Falster niður til eysturríkska Graz at vera við í Final Four í EHF Europa League-kappingini.