Flestu skipini hava fiskað sína svartkjaftakvotu

Svartkjaftafiskiskapurin hevur verið góður frá hálvum apríl og úteftir. So mikið góður, at tey flestu skipini hava fiskað sína kvotu. Bert Artic Voyager, sum kom seinni í gongd enn hini skipini, er framvegis á svartkjaftaveiðu.

Mikkjal Hammer, skipari, upplýsir, at fiskiskapurin er eitt sindur minni nú, enn hann hevur verið. Teir eru úti løtuni og vænta at hava fiskað kvotuna eftir tveir ella tríggjar túrar afturat.

Skipið hevur landað ein túr í Skagen, tí tað vóru so nógv skip, sum landaðu, at Havsbrún ikki fekk tikið ímóti øllum. Hinar túrarnar hevur Arctic Voyager landað til Havsbrún.

Føroyska svartkjaftakvotan í ár er stív 483 túsund tons, sum svarar til 38,6 prosent av strandalandakvotuni upp á góða eina millión og 251 túsund tons, ið strandalondini samdust um á árliga fundinum um svartkjaft 14. oktober í fjør.