Fingu fyrsta sigurin í Silver League

Føroysku flogbóltskvinnurnar fingu sín fyrsta CEV Silver League-sigur, tá tær vunnu 3-1 á Georgia mikudagin.

Heimaliðið kom væl frá byrjan og vann fyrsta sett 25-19. Í øðrum setti var útiliðið hvassari og við 25-22-úrslitið javnaði Georgia til 1-1.

Settúrslitini vórðu neyvt tey somu í triðja og fjórða setti, men í báðum førum vóru tað føroysku kvinnurnar, sum vóru omaná, og tá tær reyðu ikki fingu ein bólt frá Birgit Guttesen yvir um aftur netið, var føroyski sigurin veruleiki. 

Føroyar taptu greitt ímóti Montenegro í fyrsta dystinum leygardagin, og sunnudagin klokkan 16:00 spælir landsliðið við kvinnum triðja heimadystin ímóti Portugal. 

Høllin á Hálsi (Silver League, kvinnur)

Føroyar – Georgia, 3-1 (25-19, 22-25, 25-22, 25-22)