U21-HM: Nú byrjar síðsti dansurin

Týsmorgunin fer føroyska U21-landsliðið í hondbólti undir heimsmeistaraheitini í Magdeburg í Týsklandi.

Fyrsta mótstøðuliðið hjá Eliasi á Skipagøtu, Hákuni West av Teigum, Paula Jacobsen og hinum á sterka landsliðnum verður afrikanska landið, Angola. 

Dysturin byrjar klokkan 10:00 og Kringvarpið vísir hann beinleiðis í sjónvarpinum. 


Sterkt føroyskt lið ætlar sær víðari

Talan er um síðstu U-landsliðskapping hjá framúr góða 02-hondbóltárganginum. 

Elias á Skipagøtu, sum næsta kappingarár skal spæla fyri týska meistaraliðið, Kiel, hevur kallað kappingina fyri hin síðsta dansin hjá javnaldrunum á liðnum, og í einum bólki sum telir Angola, Japan og Spania, er málið at spæla seg víðari. 

 - Málið er heilt víst at koma víðari. Tað haldi eg, at vit eru ein av favorittunum til, og tað taka vit á okkum, segði Hákun West av Teigum við 3-2 í síðstu viku.

 - Gera vit okkum ómak, fyrireika okkum væl og avgreiða dystirnar í Týsklandi rætt, so skulu vit víðari, segði Mark Lausen-Marker, sum er venjari hjá liðnum saman við Juliani Johansen.

 - Eg haldi ikki, at væntanirnar eru ov høgar, tí tær koma jú av avrikum, men tað verður spennandi at síggja, um vit megna at liva upp til vónirnar, leggur hann afturat.


Eingin Óli Mittún - frá byrjan í hvussu er

Blaðungi IK Sävehof-spælarin, Óli Mittún, sum var við á U20-liðnum til endaspælið fyri einum ári síðan, verður ikki við í Magdeburg frá kappingarbyrjan.

Tað hava venjararnir gjørt av saman við Óla Mittún sjálvum, sum verður við á U19-landsliðnum, sum eisini skal spæla endaspæl í summar.

 - Sjálvandi hevði hann verið ein hjálpandi hond, men eg tori væl at siga, at vit klára okkum uttan, segði Hákun West av Teigum.

 - Vit halda, at hann hevur havt eitt langt kappingarár. Hann hevur spælt seniorhondbólt í Svøríki, hann hevur verið á A-landsliðnum og síðsta summar spældi hann í tveimum endaspølum, greiddi Mark Lausen-Marcher frá.

Kviki úrmælingurin er kortini við á almenna 27 mans-hóplistanum, og sum skilst er ein lítil møguleiki fyri, at Óli Mittún verður innkallaður, um tað eydnast Føroyum at spæla seg víðari úr bólkaspælinum.

Mánadagin fór føroyska liðið úr Føroyum til Týsklands, og í morgin byrjar kappingin. Hósdagin er Japan á skránni, áðrenn sponsku evropameistararnir eru mótstøðulið fríggjadagin. 

Kringvarpið sendir allar dystirnar hjá Føroyum. Fyrsti dysturin er týsmorgunin kl. 10, leinkja til beinleiðis sjónvarp er her.