Putin: Wagner-bólkurin fingið 6,8 millardir

Hernaðarligi Wagner-bólkurin fekk 86 milliardir rublar frá russiska ríkinum, frá mai í fjør til mai í ár.

Tað svarar til 6,8 milliardir kr. í okkara peningi.

Tað upplýsti Vladimir Putin, forseti, í eini røðu fyri russiskum hervyirmonnum, sum var send á einari videoupptøku.

Putin segði eisini, at leiðarin í Wagner-bólkinum, Jevgenij Prigozjin, hevur forvunnið milliardir av rublum.

Nú fara russisku myndugleikarnir at kanna, hvussu peningurin, sum Wagner-herurin og  Prigozjin hava fingið, er brúktur.

Putin leggur samstundis dent á, at hevði uppreisturin leygardagin eydnast, høvdu fíggindar Russlands gjørt sær dælt av støðuni.

Wagner-herur, Wagner-hermenn í Rostov

Wagner-hermenn í russiska býnum Rostov leygardagin, tá boð komu um, at teir skuldu gevast við uppreistrinum móti Russlandi. (Mynd: Ritzau Scanpix)

Prigozjin komin til Hvítarusslands

Forsetin í Hvítarusslandi,  Alexander Lukasjenko, upplýsti í dag, at Wagner-leiðarin, Jevgenij Prigozjin, er komin til Hvítarusslands.

Eftir at Wagner-herurin gavst við uppreistrinum móti Russland leygardagin, ljóðaði, at Prigozjin kundi flyta til Hvítarusslands,og samstundis sleppa undan russiskum ákærum.

Wagner-leiðarin hevur ikki verið at sæð alment síðani uppreisturin helt uppat. Tá sást hann í einum bili, sum fór úr russiska býnum Rostov.