Skulu forvinna 39.000 kr. fyri at fáa familju til Føroya

Bruttoinntøkan skal vera minst 38.818 kr. um mánaðin, vilja fólk hava hjúnafelaga ella samliva og eitt smábarn til Føroya.

1248 krónur koma aftrat fyri hvørt barnið upp í fýra børn.

Hetta er hægsta markið. Onnur mørk eru eisini. Tað veldst um, hvønn fólk vilja hava til Føroya.

Kunngerð til hoyringar

Uppskot um kunngerðina um inntøkumarkið hjá útlendingum, sum vilja fáa familjuna hjá sær til Føroya, er nú sent til hoyringar. Kunngerðin verður ikki fyri tey, sum longu hava søkt um uppihaldsloyvi í Føroyum.

Við uppskotinum koma nýggj inntøkumørk sum treyt fyri, nær útlendingar við vinnuligum uppihaldsloyvi kunnu fáa familju sína við sær til Føroya.

Ábendingar eru um, at nógvar útlendskar familjur, har hjúnafelagin, makin og/ella børnini eru komin til landið sum samfylgjandi, hava trupult við at fáa endarnar at røkka saman, sigur Løgmálaráðið. 

Orsøkin er, at inntøkan hjá tí, sum hevur vinnuliga uppihaldsloyvið, er ov lítil til, at viðkomandi kann uppihalda sínari familju.