Fundir við kommunur og vinnu um tiltøk móti Russlandi

Høgni Hoydal, landsstýrismaður í uttanríkismálum, hevur í dag tveir hoyringarfundir í sambandi við ætlaðu tiltøkini móti russiskum skipum í føroyskum øki.

Fyrri fundurin er við kommunur og við tey, sum varða av havnunum. 

Seinni fundurin er við umboð fyri vinnuna, sum havnarstongsulin ávirkar.

Á báðum fundunum verður útgreinað, hvat verður sett í verk, og hvat hetta hevur við sær.

Ráðførsla í morgin

Síðan fer landsstýrismaðurin at ráðføra seg við uttanlandsnevndina hjá løgtinginum í morgin um tiltøkini, sum landsstýrið ætlar at seta í verk móti Russlandi.

- Eftir ráðførsluna kunnu tiltøk setast í verk, sigur Høgni Hoydal, landsstýrismaður.

Landsstýrið hevur sagt, at russisk skip sleppa bara at umskipa tað, sum loyvt er at fiska sambært fiskirættindaavtaluni við Føroyar, í føroyskum havnum.

Og avmarkað verður, hvørjar tænastur, russisk skip sleppa at keypa í Føroyum.

Avgerðin um fiskiveiðusamstarvið við Russland í 2024 verður tikin í heyst.