Prigosjin er aftur í Russlandi

Leiðarin av Wagner-bólkinum, Jevgenij Prigosjin, er aftur í Russlandi.

Tað váttar hvítarussiski forsetin, Alexander Lukasjenko, sambært Reuters.

Prigosjin kom til Hvítarusslands 27. juni, sum partur av eini avtalu, hann gjørdi við Lukasjenko og Vladimir Putin, eftir at hann og Wagner-herliðið fór úr Ukraina og setti kós móti Moskva.

Er í St. Pætursborg

Men Lukasjenko sigur í dag, at Prigosjin ikki longur er í Hvítarusslandi, men í St. Pætursborg.

Alexander Lukasjenko hevur boðið Wagner-herliðunum at gera eina støð í Hvítarusslandi, og tað tilboðið stendur við, sigur hann.

Sambært Lukasjenko er Jevgenij Prigosjin ein frælsur maður, og hann hevði tosað við hann í telefon í gjár.

Vladimir Putin segði eftir avtaluna, sum var gjørd, at Prigosjin var ein frælsur maður, og at Wagner-hermenninir kundu velja, um teir vildu fara heim, gerast partur av russiska herinum, ella fara við Prigosjin til Hvítarusslands.