Icelandair gjørt sáttmála við Airbus um 13 nýggj flogfør

Icelandair og framleiðarin, Airbus, hava skrivað undir sáttmála um at keypa upp í 25 nýggj Airbus-flogfør.

Tað skrivar Morgunblaðið í dag.

Sambært sáttmálanum skal Icelandair keypa 13 flogfør av slagnum A321XLR, og hevur møguleika at keypa 12 aftrat. Fyrstu flogførini skulu vera klár í 2029.

Langtíðarleiga flogfør

Harumframt hevur Icelandair gjørt semju við felagið SMBC Aviation Capital um at langtíðarleiga fýra nýggj Airbus A321LR flogfør, sum verða klár seint í 2024, skrivar Morgunblaðið.

Icelandair boðar eisini frá í dag, at felagið í juni mánaði hevði meir enn eina hálva millión ferðafólk.

Samlaða talið av ferðafólkum á rutunum hjá Icelandair í juni var 519.000. Tað eru góð 20 prosent fleiri enn í juni í fjør, tá ferðafólkatalið var 431.000.

Icelandair og Airbus

1,8 mió. ferðafólk

Fyrra hálvár í ár hevði Icelandair 1,8 milliónir ferðafólk, sum er 31 prosent meir enn fyrra hálvár í fjør.

Icelandair hevur fleiri rutur til Norðuramerika, og tær eru vælumtóktar.

Sambært felagnum vóru 90 prosent av setrunum til og úr Norðuramerika seld í juni, og tað er tað mesta, sum hevur verið í juni mánaði, sigur Icelandair sambært Morgunblaðnum.