Svøríki og Turkaland viðgera Nato-limaskap

Aðalskrivarin í Nato, Jens Stoltenberg, er vertur, tá ið uttanríkisráðharrin í Svøríki og Turkalandi hittast í Brússel í dag.

Finski uttanríkisráðharrin verður eisini á fundinum.

Tíðin hjálpir ikki Svøríki í royndini at gerast limur í Nato á toppfundinum, sum verður í Vilnius í næstu viku.

Turkaland sýtir framvegis fyri at góðkenna svensku umsóknina.

Í dag hittast svenski uttanríkisráðharrin, Tobias Billstrøm, og turkiski uttanríkisráðharrin, Hakan Fidan, á Nato-høvuðsstøðini saman við Elinu Valtonen, uttanríkisráðharra í Finnlandi. 

Hakan Fidan - Mynd: AFP

Hakan Fidan er turkiskur uttanríkisráðharri. (Mynd AFP)

Finska umsóknin játtað

Finnland søkti saman við Svøríki um limaskap, eftir at Russland gjørdi innrás í Ukraina í fjør.

Finska umsóknin var játtað í apríl, men Svøríki bíðar framvegis eftir grønum ljósi.

Heldur ikki Ungarn hevur góðkent svensku umsóknina, men Turkaland er stóra forðingin í tilgongdini.

Turkaland hevur sett fleiri krøv til umsøkjaralondini, og vil hava fleiri fólk útflýggjað. 

Fleiri Nato-lond, eitt nú USA, leggja trýst á fyri at fáa svensku umsóknina góðkenda.

Samstundis er turkiski forsetin, Recep Tayyip Erdogan, í øðini um, at svenskir myndugleikar hava givið loyvi til at brenna eitt eintak av koranini uttan fyri eina mosku í Stokkhólmi í síðstu viku.