Gull, gull og meira gull

Heiðursmerkini hava regnað niður yvir føroyingarnar á øðrum kappingardegi í Guernsey.

Heili sjey gullheiðursmerki eru komin undir land í svimjing, frælsum ítrótti, bogaskjóting og badminton. 


Gull og oyggjaleikamet í frælsum ítrótti

Føroyingarnir á Footes Lane-leikvøllinum, sum annars var stúgvandi fullur av áskoðarum, høvdu ilt við at trúgva sínum egnu eygum.

Stórar vónir vóru til Jónas Isaksen, og tær livdi hann væl og virðiliga upp til. Hann vann 400 metur renningina við tíðini 46.02 sekund, sum er nýtt oyggjaleikamet. Honum á baki kom heimamaðurin, Cameron Chalmers, við 46.33. 

Men gullveitslan var langt frá liðug. Eiri Jógvansson Glerfoss hevði runnið seg í finaluna við góðari tíð, men tá tað galt, var hann uppaftur skjótari. Við tíðini 10.58 fór hann avstað við gullinum og nýggjum føroyskum meti.

Í spjótkasti vann Sunniva Bogadóttir silvur við einum kasti upp á 35 metur. Honn miðjaði eftir 40 metrum, so hon var ikki heilt nøgd við avrikið.


Yngsti maður gull

Í svimjing legði yngsti maður í oyggjaleikahópinum, Líggjas Joensen, hart út. Hann vann gull í 1500 frí og Heini Mohr Askham endaði nummar tvey í somu finalu. 

Alisa Bech Vestergård vann silvur í 200 frí, meðan Ísak Brisenfeldt fekk triðja plássið í 200 firvald við tíðini 2:03.2, sum er nýtt føroyskt juniormet. Eyðrið Mortensen fekk bronsu í 400 metur blandað, og tað sama gjørdi Bartal Erlingsson Eidesgaard í 50 bringu.


Bogaskjúttarnir siktaðu væl

Eisini bogaskjúttarnir gjørdi eitt gott hál mánadagin. Teir skutu fýra umfør úr ymsum frástøðum, og tá í avtornaði vunnnu teir trý gull.

Hans Petur Højgaard vann kappingina í recurve hjá monnum. Jóannes Poulsen skeyt seg upp á fyrsta plássið í compound fyri menn, og Føroyar vunnu eisini liðgullið í recurve.


Badmintonliðið vann finaluna á Grønlandi

Føroyska badmintonliðið hevði ein framúr góðan dag í Guernsey. Fyrst bastu tey heimaliðnum, og í finaluni vunnu føroyingarnir 3-1 á Grønlandi og tryggjað badminton fyrsta gullið á Guernsey.

Innsløg úr øllum hesum kappingunum koma á kvf.fo/oyl2023