Ukraina er á veg upp í NATO

- Ukraina fær limaskap í NATO, og er nú nærri NATO enn nakrantíð.

Tað staðfesti NATO-aðalskrivarin, Jens Stoltenberg, á tíðindafundi í Vilnius fyrrapartin saman við ukrainska forsetanum, Volodymyr Zelenskyj.

Leiðararnir í teimum 31 NATO-londunum eru í hesum døgum í litaviska høvuðsstaðnum.

Semja er um eina tilgongd í trimum stigum, ið skal tryggja Ukraina limaskap í verjusamgonguni.

Tilgongdin skal gerast smidligari, so Ukraina sleppur undan at skula ígjøgnum virkisætlanina, ið vanliga verður brúkt.

- Avgerðin í Vilnius er eitt nýtt markamót í samstarvinum millum NATO og Ukraina, segði NATO-aðalskrivarin.