Funnu hassj umborð á grønlendskum rækjutrolara

Løgreglan í danska býnum Frederikshavn hevur lagt hald á fýra kilo av hassji umborð á einum rækjutrolara hjá grønlendska reiðarínum Polar Seafood.

Trolarin lá við bryggju í Frederikshavn, og skuldi eftir ætlan fara til Grønlands.

Hassjið lá í eini ruskbingju, skrivar Nordjyske.

Ein hundur hjá tollvaldinum fann hassjið. 

Eingin kendist við hassjið

14 av manningini vóru umborð, og teir eru skrásettir, men eingin kendist við hassjið, skrivar Nordjyske.

Eingin er skuldsettur í málinum enn.

Rækjutrolarin hevur nú sett kós móti Grønlandi.

Hetta er ikki fyrstu ferð, at hassj er funnið umborð á grønlendskum trolara í Danmark.

Í juni í fjør vóru funnin 23 kilo av hassji umborð á einum øðrum rækjutrolara, skrivar Nordjyske.