Irak leggur Danmark undir at brenna koranir

Svøríki hevur verið fyri nógvum atfinningum úr Miðeystri og sendistovan í Baghdad varð álopin, eftir at koranir vórðu brendar í Svøríki. Stórar mótmælisgongur hava verið, og svenskir myndugleikar hava biðið svenskarar í Miðeystri um at ansa eftir sær.

Men nú er Danmark eisini við at koma í brennidepilin, júst sum undir Mohammed-kreppuni fyri árum síðan. Irakiska uttanríkisráðið hevur sent eitt tíðindaskriv, har stjórin upp á tað harðligasta hartar Danmark fyri at brenna koranir og irakiska flaggið framman fyri irakisku sendistovuni í Keypmannahavn.

Løgreglan í Keypmannahavn váttar fyri DR, at eldur varð settur á eina bók uttanfyri irakisku sendistovuna í gjár, men kann ikki vátta, at talan er um eina koran. Løgreglan ætlar ikki at kanna málið nærri, tí tað er ikki ólógligt at seta eld í eina bók, sum man sjálvur eigur.