Fyrrverandi borgarstjóri er ímóti vindmyllulund, hann gav byggiloyvi til

Prinsipielt byggiloyvi varð í 2019 latið til verkætlanina um eina vindmyllulund í Klivaløkshaga heima á Sandi. 

Ein teirra, sum hevur funnist at verkætlanini, er Brandur Sandoy, fyrrverandi borgarstjóri.

Stutt eftir borgarafund um vindmyllulundina, sum var heima á Sandi 7. juni, viðmerkti hann í lesarabrævi, at:

"Grundleggjandi eri eg av teirri hugsan, at Sandoyggin er ein perla, sum vit við hond og fót mugu royna at halda fast við, so vit lata eftirkomarunum oynna í sama standi ella betri enn vit hava fingið hana um hendi."

Vindmyllur á Sandi

Í viðmerkingini setur Brandur Sandoy eisini spurnartekin við, hvør fer at framleiða streymin og peikar á, at kommunukassin heima á Sandi ikki fær nakran pening fyri vindmyllurnar. 

Gav sjálvur prinsipielt byggiloyvi

Men í innliti, sum Kringvarpið hevur fingið, sæst, at tað var í 2019, at Sands bygdaráð samtykti  at lata loyvi at seta eina vindmátimastur í Klivaløkshaga syðra parti.

Somuleiðis varð eisini samtykt at geva prinsipielt byggiloyvi til vindmyllulund-verkætlanina. 

Hetta var meðan Brandur Sandoy sjálvur var borgarstjóri í Sands kommunu. 

Borgarafundur á Sandi um vindmyllur, vindmyllur á Sandi

Bæði fyri og ímóti

Á borgarafundinum 7. juni í ár um ætlaninar at seta vindmyllulund upp í Klivaløkshaga heima á Sandi, greiddu Umhvørvisstovan og SEV frá ætlanini og svaraðu spurningum frá fundarfólkunum.

Á fundinum vóru summar røddir fyri og aðrar ímóti ætlanini.

Tær, sum vóru ímóti, funnust at ætlanini, tí at hetta fer at oyðileggja vøkru náttúruna, sum er heima á Sandi.

Og tær, sum eru fyri, halda millum annað, at øll eiga at taka eitt tak í grøna orkuskiftinum.

Vindmyllur á Sandi

Burdi verið staðsett aðrastaðni

Í lesarabrævinum skrivar Brandur Sandoy millum annað, at: 

"Samanumtikið ætlar man sær at seta upp vindmyllur mitt í eini náttúruperlu, nær einum bygdum øki. Bara tað, eigur at verða nokk til at ætlanin verður broytt, eitt nú sum á Eiði í sínari tíð."

Og víðari:

"Kvalurnar verða nógvar av staðsetingini, sum hevði verið betri alla aðrastaðni í oynni enn har ætlanin er."

Brandur Sandoy vil ikki gera viðmerking um hetta til útvarpið í dag.