Lettland: Stjórnin leggur frá sær

Stjórnin í Lettlandi leggur frá sær í hesi vikuni. Tað boðaði lettlendski forsætisráðharrin Krisjanis Karins frá á tíðindafundi fyrr í dag.

Stjórnin leggur frá sær í kjalarvørrinum av, at hinir samgonguflokkarnir í farnu viku ikki vildu ganga við til uppskotið hjá Karins um at skifta nakrar ráðharrar út.

Flokkurin hjá Krisjanis Karins, Jauna Vienotiba, sum merkir "Nýggj eind", fer mikudagin at boða frá, hvønn flokkurin hevur í uppskoti sum nýggjur forsætisráðharri.

Í síðsta enda er tað upp til forsetan Edgars Rinkevics at geva loyvi til, at ein møguligur nýggjur forsætisráðharri kann royna at skipa stjórn. Og tjóðartingið skal eisini atkvøða, áðrenn ein nýggj samgonga kann skipa nýggja stjórn.