Gongur væl hjá Norwegian

Norska flogfelagið Norwegian hevði 538 milliónir norskar krónur í avlopi fyri skatt í øðrum ársfjórðingi í ár, skrivar NRK.

Tað eru umleið 348 milliónir krónur í okkara pengum.

Norwegian hevur havt stóra framgongd seinasta árið. Felagið flutti í øðrum ársfjórðingi 5,6 milliónir ferðafólk samanborið við fimm milliónir sama tíðarskeið í fjør.

Felagið heldur eisini væl sínar ferðaætlanir, tí í mai í ár nevndi greiningarfyritøkan,  Cirium, Norwegian sum mest stundisliga flogfelag í Evropa.

Herfyri gjørdi Norwegian ein milliardasáttmála við norsku verjuna, og í summar kom eisini fram, at Norwegian fer at keypa flogfelagið Widerøe, sum millum annað flýgur millum Noreg og Føroyar.