Eiga at fáa fleiri grundstykki um tveir ella tríggjar mánaðir

-  Er politiskur vilji, eiga tað ikki at ganga meiri enn tveir ella tríggir mánaðir, til farast kann undir arbeiðið við fleiri grundstykkjum í Kollafirði.

Tað sigur Annika Olsen, býráðslimur fyri Tjóðveldi, í Tórshavnar kommunu.

Tá ið samgongan í Tórshavnar kommunu arbeiddi við at selja 22 grundstykki á Hamrabøi í Kollafirði bíligari enn í Havn, altso fyri marknaðarprís, var táverandi minniluti ímóti hesum.

Uttanlandsnevndin, Annika Olsen

Annika Olsen, býráðslimur í Tórshavnar kommunu. (Mynd: Bjarni Árting Rubeksen)

Í minnilutanum var Heðin Mortensen, sum nú er borgarstjóri í kommununi. Minnilutin kærdi samgonguna til Innlendismálaráðið fyri at selja grundstykkini bíligari enn vanligt var.

Hoyr innslag í útvarpstíðindunum: 

Borgarafundur verður í Kollafirði í kvøld kl 18:30 í skúlanum, har støðan hjá bygdini er á skránni.

Allir 13 býráðslimirnir í Tórshavnar kommunu hava fingið innbjóðing.

Í Breddanum fríggjadagin, svaraði borgarstjórin ikki, um hann fór at møta upp ella ikki.

Bara tveir býráðslimir hava boðað frá, at teir koma. Tveir, sum eru uttanlands, hava boðað frá, at tað liggur ikki fyri hjá teimum.