Iransk mannarættindastríðskvinna fær friðarheiðursløn Nobels

Iranska mannarættindastríðskvinnan, Narges Mohammadi, fær friðarheiðursløn Nobels í ár fyri stríð sítt fyri frælsi í Iran.

Tað kunngjørdi norska Nobel-nevndin fyrr í dag. 

Narges Mohammadi er fongslað í heimlandinum, tí hon hevur lagt iransku trygdardeildirnar undir at fremja ágang í sambandi við kravgongur til frama fyri frælsi hjá iranskum kvinnum.

Narges Mohammadi er 51 ára gomul, og er fødd í iranska býnum Zanjian. Hon er næstforkvinna í felagsskapinum Defenders of Human Rights Center, sum Shirin Ebadi, ið eisini hevur fingið friðarheiðursløn Nobels, hevur stovnað.

Síðani 2011 er Mohammadi fleiri ferðir dømd fongsulsrevsing, og nú situr hon ein dóm, sum hon fekk í fjør.

Hon var dømd átta áta fongsulsrevsing og 74 koyrlasløg. Seinni er revsingin herd.

Berit Reiss-Andersen

Berit Reiss-Andersen er forkvinna í Nobel-nevndini. (Mynd: Reuters/Ritzau Scanpix)

Nógv hava gingið kravgongu

Forkvinnan í Nobel-nevndini, Berit Reiss-Andersen, sigur, at friðarheiðurslønin í ár er eisini av heiðursløn til tey hundrað túsund tals fólkini, sum hava gingið kravgongu móti iransku myndugleikunum. 

Fyri umleið einum ári síðani doyði  Jina Mahsa Amini í einum iranskum varðhaldi.

Moralløgregan í Iran handtók hana, tí løgreglan vildi vera við, at turriklæðið á høvdi hennara sat ikki sum tað skuldi.

Løgreglan segði seinni, at hon doyði í varðhaldinum av einum hjartatilburði, men sjónarváttar hava sagt, at hon var illa bukað á veg í varðhaldið. 

Hendingin hevði við sær ógvisligan ófrið í Iran.