Finsk gassleiðing og samskiftiskaðal fingið skaða

Greiðar ábendingar eru um, at skaðarnir á eina gassleiðing og ein samskiftiskaðal í Finsku víkini eru komnir av mannaávum, og tað líkist eini tilætlaðari gerð.

Tað er niðurstøðan hjá finsku kanningarnevndini, sum vísir á, at skaðarnir á gassleiðingina og samskiftiskaðalin millum Finnland og Estland eru so stórir, at tað bert kann vera tilætlað.

Tíðindafundur var fyrr í dag í sambandi við, at finskir myndugleikar sunnudagin komu eftir, at trýstið í gassleiðingini Balticconnector, sum gongur millum Finnland og Estland, var minkað. Stutt seinni varð skaði eisini staðfestur á ein samskiftiskaðal millum londini.

Finska sjóverjan sigur, at gassleiðingin og samskiftiskaðalin ikki liggja lið um lið, men at tey eru í sama landafrøðiliga øki, í Finsku víkini og innanfyri búskaparliga økið hjá Finnlandi.

Sambært finsku telefyritøkuni Traficom eru samskiftistænasturnar í Finnlandi ikki ávirkaðar av skaðanum. Og finski forsætisráðharrin Petteri Orpo sigur, at finska orkutrygdin eins væl og samskiftistrygdin ikki eru í vanda.