Vinstriflokkurin skal hava nýggjan formann

Vinstriflokkurin í Danmark skal hava nýggjan formann.

Á tíðindafundi fyrrapartin boðaði Jakob Ellemann-Jensen frá, at hann leggur frá sær sum floksformaður, og at hann gevst í politikki.

Jakob Ellemann-Jensen hevur verið formaður í Vinstra seinastu seinastu fýra árini.

Tá Jakob Ellemann-Jensen kom aftur úr sjúkrafarloyvi, tók hann aftur við sessinum sum verjumálaráðharri, men stutt eftir segði hann henda ráðharrasessin frá sær, og tók við sum búskaparmálaráðharri.

Stephanie Lose

Stephanie Lose verður organisatoriskur leiðari í Vinstra, til landsfundin, sum verður í november. (Mynd: Ritzau Scanpix)

At Jakob Ellemann-Jensen nú gevst í politikki, hevur við sær, at Troels Lund Poulsen, sum hevur verið verjumálaráðharri, eisini verður varaforsætisráðharri í stjórnini og fyribils búskaparráðharri.

Stephanie Lose, sum er næstforkvinna í flokkinum,  verður organisatoriskur leiðari í Vinstra, til landsfundin í november. 

Tað vóru eisini tey bæði, sum tóku um endan, tá Jakob Ellemann-Jensen fór í sjúkrafarloyvi.

Troels Lund Poulsen

Troels Lund Poulsen er nú aftur bæði verju- og búskaparráðharri. (Mynd: Ritzau Scanpix)

Skuggar fyri 

Vinstriflokkurin hevur ongantið staðið seg so illa í veljarakanningunum sum nú, og á tíðindafundinum fyrrapartin segði Jakob Ellemann-Jensen, at hann skuggar fyri, at flokkurin fær framgongd.

- Tí taki eg avleiðingarnar  og leggi frá mær sum formaður. Vinstriflokkurin hevur ikki ta stødd, sum flokkurin eigur at hava, segði fráfarandi formaðurin.

Veljarakanningar vísa, at var val nú, hevði Vinstriflokkurin fingið 8,7 prosent av atkvøðunum. 

Síðani Jakob Ellemann-Jensen gjørdist floksformaður í 2019, hava veljararnir vent flokkinum bakið.

Ein veljarakanning, sum danska kringvarpið gjørdi stutt eftir, at Jakob Ellemann-Jensen hevði tikið við sum formaður, stóð flokkurin at fáa 24,6 prosent av atkvøðunum.

Á fólkatingsvalinum í fjør fekk Vinstri 13,3 prosent av atkvøðunum.