Ikki við fyri at vera pyntidukkur

Um nakar ivaðist, so ivast tey neyvan longur.

Sannførandi Conference League-sigurin hjá KÍ á Olimpija Ljubljana ger, at klaksvíkingar framvegis hava góðar møguleikar at spæla seg víðari í kappingini. 

Tað hevur verið málið frá byrjan, og er tað framvegis, staðfesti KÍ-liðskiparin og málskjúttin, Jákup Biskopstø Andreasen, eftir dystin.

 - Tað hevur alt at siga, at vit fáa tann fyrsta sigurin. Tað er kanska ein sensatión, at vit eru við (í bólkaspælinum, red.), men vit eru við, tí vit ætla okkum víðari. Vit eru ikki við fyri at vera pyntidukkur á vøllinum, segði Jákup Biskopstø Andreasen eftir dystin á Tórsvølli.

Liðskiparin skallaði sjálvur málið til 3-0 eftir horna úr vinstru frá Árna Fredriksberg, eftir at René Shaki Joensen og Páll Klettskarð høvdu givið KÍ eina 2-0 leiðslu fyri steðgin. 

 - Vit hava sum altíð góðar skjúttar, og vit hava eisini liðið til at kunnað seta bóltin inn inni í brotsteiginum, segði KÍ-liðskiparin.

KÍ hevur nú fýra stig aftanfyri Slovan Bratislava, sum hevur seks stig, og Lille, sum er fremst við sjey stigum.