KÍ kann taka stórt stig í Ljubljana

Við sigri á Olimpija Ljubljana í kvøld er ikki ósannlíkt, at KÍ kann spæla seg víðari úr Conference League-bólkaspælinum, tá Slovan Bratislava vitjar á Tórsvølli síðst í november.

Um tað eydnast at vinna á Stadion Stožice koma klaksvíkingar upp á sjey stig. Slovan Bratislava hevur seks stig undan fjórða umfari, men spæla ímóti franska liðnum, Lille, sum er oddalið og favorittur í Bratislava í kvøld.

 - Vit mugu hava 10 stig (fyri at koma víðari, red.), tað eri eg nokkso vísur í. Um vit ikki fáa fult, mugu vit vinna tveir teir síðstu, og tað verður munandi verri, segði KÍ-venjarin, Magne Hoseth, við portal.fo eftir venjingina í gjár.

Sami taktikkur

Slovenska liðið fekk harðar atfinningar fyri tapið á Tórsvølli fyri tveimum vikum síðan. Tí vænta KÍ-spælararnir ein munandi truplari dyst í kvøld ímóti einum sperdum heimaliðið, sum skal reisa seg eftir dystin í Føroyum.

 - Vit vita, at hetta er eitt gott lið, sum vit spæla ímóti, hóast nógv kanska ikki hildu tað, tá vit spældu á Tórsvølli seinast, men vit vænta, at dystarmyndin verður nøkulunda hin sama, segði Árni Fredriksberg við portal.fo.

Kí - Olimpija Ljubljana, Kí

 - Teir hava okkurt at prógva eftir dystin á Tórsvølli, og tí vænti eg, at teir koma at leggja hart út, men fyri okkum er tað sama galdandi; Tað harða arbeiði, viljin, at halda málið reint og so at skora málið, sum vit hava tørv á, tá kjansurin kemur, sigur KÍ-vongurin, sum hevur lagt upp til trý mál í bólkaspælinum.

Olimpija Ljubljana - sum eins og KÍ er í sínum fyrsta bólkaspæli - hevur onki stig fingið enn, og í landskappingini hevur høvuðsstaðarliðið ikki vunnið á heimavølli síðstu tríggjar dystirnar. 

Kí - Olimpija Ljubljana, Kí

Stadion Stožice tekur umleið 16.000 áskoðarar, men sambært bolt.fo eru bert 2500 atgongumerki seld til dystin í kvøld.

 - Eg vænti ikki, at tað skal so nógv til, áðrenn teir verða sperdir, og so liggur tað á okkum at spæla ein góðan dyst, sigur Magne Hoseth, sambært portal.fo. 

Kí - Olimpija Ljubljana, Kí

Lyklaspælari skaddur

Ein av heilt stinnu spælarunum hjá KÍ í Evropa í summar er René Shaki Joensen. Hann er skaddur og er ikki við í Slovenia. Tað er Hallur Hansson heldur ikki, og líkt er til, at miðvallarin verður uttanfyri í eina tíð.

Hinvegin er Odmar Færø klárur, og hann verður helst í miðverjuni saman við Heina Vatnsdal og Vegard Forren, og teirra avrik verður enn sum áður týdningarmikið í royndini hjá KÍ at fáa síni fyrstu útivallarstig í Conference League