Kanning fær góða undirtøku, men fleiri skulu við

Tað hevur gingið væl at fáa føroyingar at siga Fólkaheilsustýrinum frá, hvussu teir hava tað. 

Meira enn 60 prosent av teimum 8.000 spurdu hava svarað spurnablaðnum ”Hvussu hevur tú tað?” á Vanganum. 

Kortini heitir Fólkaheilsustýrið á enn fleiri um at svara, áðrenn freistin er úti á midnátt.

- Tess fleiri svara, tess betri, sigur Vár Honnudóttir, verkætlanarleiðari, og leggur dent á, at svarprosentið hevur týdning fyri virðið á kanningini. 

Tveir triðingar

- Umboðanin higartil er rættiliga góð, økini eru javnt umboðað, allir aldursbólkar eru við, og bæði kyn eru eisini væl umboðað. 

Tey eru væl nøgd í Fólkaheilsustýrinum, men vóna kortini, at endaspurturin verður so mikið góður, at tilsamans tveir triðingar fara at svara.

Tað er til gagns fyri okkum øll í Føroyum, at vit fáa føroysk hagtøl um heilsu, sjúku og trivnað hjá føroyingum, sigur Fólkaheilsustýrið. 

Hetta er serstøk vitan, sum kann brúkast til at raðfesta átøk á heilsuøkinum, skrivar Fólkaheilsustýrið, og vísir til, at spurnablaðið er tøkt á Vanganum undir Fólkaheilsustýrinum.