Shakira sleppur undan rættarmáli

Tónleikarin Shakira hevur gjørt avtalu við sponsku skattamyndugleikarnar um at sleppa undan rættarmáli. 

Tað boðar dómarin frá, sambært Reuters.

Rættarfundur skuldi vera í Barcelona í dag í málinum, har hon var ákærd fyri ikki at hava uppgivið 14,5 milliónur evrur í skatti.

Tað svarar til góðar 108 milliónir krónur, og hon kundi fáa upp í átta ára fongsul og 24 milliónir evrur í bót, skrivar The Guardian.

117 vitni

Spanska ákæruvaldið hevði kallað inn 117 vitni fyri at prógva, at hon var spanskur ríkisborgari, eitt nú dansilærarar, frisørar, serlæknar í kvinnusjúkum, tøkningar í upptøkuhølum og bilstjóran hjá henni.

Skattavaldið hevur eisini sagt, at Shakira við beráddum huga hevur skákað sær undan at rinda skatt.

46 ára gamla sangarinnan hevur undan rættarfundinum svorið uppá, at hetta eru falskar ákærur, og at hon fer at stríðast fyri rættvísi.

Í dag, sama dag, sum rættarmálið skuldi byrja, hevur hon gjørt avtalu við sponska skattavaldið fyri at sleppa undan sakarmáli. Hon fær í staðin bøtur, sum svara til helmingin av tí, sum hon skyldaði í skatti.