Gadus og Emerald liggja báðir í Båtsfjord

Hanus Hansen, stjóri í JFK og reiðari, sigur, at Gadus mátti inn, tí ein brennievnispumpa brotnaði. Gadus hevði tá fiskað í 12 dagar í Barentshavinum.

Hanus Hansen sigur, at tað sjálvandi er harmiligt, tá slíkt hendir, tí tað sum vera man órógvar fiskiskapin. Hann sigur, at væntandi sleppur Gadus aftur til fiskiskap í morgin ella ovurmorgin.

Gadus er spildurnýggjur og var júst farin undir sín fyrsta túr, tá brennievnispumpan fór. Hanus Hansen sigur, at hóast skipið er nýtt, so er tað ikki óvanligt, at slík óhapp henda. Annars hevur nýggi Gadus roynst væl higartil, sigur Hanus Hansen, reiðari.

Emerald kom eisini inn á Båtsfjord í gjár, og servicemenn hava verið umborð og hugt eftir onkrum møguligum breki. Emerald hevur havt byrjunartrupulleikar og hevur bara fiskað í ein mánað, hóast teir nú hava verið burtur í tveir mánaðir.

John Mikkjal Godtfred, skipari á Emerald, sigur, at teir væntandi fáa boð mánadagin um, nær teir kunnu fara út aftur.

Hann sigur, at fiskiskapurin kundi verið frægari. Teir hava 300 tons inni í løtuni, men hetta er heldur ikki besta tíð til rækjufiskiskap, sigur skiparin.