Harðari revsing fyri at brúka telefon í bili

Klipp og størri sekt fyri at brúka handhildna telefon ella annað handhildið samskiftistól, meðan koyrt verður.

Sektin skal fara úr 1000 krónum upp í 1500 krónur.

Tað er ein broyting í ferðslulógini, sum er á veg í løgtingið.

Uppskotið er sent til hoyringar.

Null-hugsjónin

Í 2006 samtykti løgtingið, at null-hugsjónin skal í ferðslulógina. 

Null-hugsjónin er, at eingin skal doyggja ella fáa álvarsligt mein í ferðsluni.

Seinastu árini hevur gáloysni verið ein afturvendandi trupulleiki í ferðsluni, sigur Samferðslumálaráðið. 

Nú koma rúsevni aftrat rúsdrekka í ferðslulógina, tá ræður um revsingina at missa koyrikortið treytaleyst.

Og tað verður forboðið at brúka lítil motordrivin akfør, sum til dømis rennihjól, á økjum, sum ferðslulógin umfatar.