Enn eitt stórálop á veg í Gasa

Ísraelski herurin ger seg til reiðar at fara undir eitt stórálop á býin Khan Younis, sum liggur har suðuri í Gasa-geiranum.

Hetta er ein býur, sum tók móti nógvum flóttafólki, tá Ísrael leyp á sjálvan Gasa bý, sum liggur har norður í geiranum. Tá heitti ísraelski herurin á fólk um at fara suðureftir.

Og nú er ísraelski herurin komin við eini áheitan á fólk í Khan Younis um at fara úr býnum til al-Mawasi, sum er ein lítil geiri út móti Miðjarðarhavinum. Hann er bara 8,5 ferkilometrar til støddar, har eru nøkur fá hús og annars er tað mesta landbúnaðarjørð. Skulu flóttafólkini flyta, er talan um tvær milliónir fólk, sum skulu hýsast har.

Mark Regev er ráðgevi hjá Benjamin Netanyahu, forsætisráðharra, og hann sigur, at Ísrael roynir sum frægast at verja sivilfólk. Ísrael er undir alt størri trýsti at seta eina vápnahvíld í gildi, men tað vil landið ikki.

- Vit kunnu steðga bardøgunum her og nú, um tað er ynskiligt. Einasta kravið er, at gíslarnir verða lætnir leysir, sigur Mark Regev við bretska BBC.