Gera málið um eldin á Stykkinum liðugt í dag

Málið um eldin á Stykkinum í september í 2021 verður gjørt liðugt í Føroya rætti í dag.

Málið var í rættinum fyri góðum tveimum mánaðum síðani, men var tá ikki gjørt liðugt.

Sambært ákæruritinum, eru tveir menn fyrst í tjúgunum ákærdir fyri seint eitt septemberkvøld í 2021 at hava brotið inn í eini hús á Stykkinum og sett eld á húsini.

Annar maðurin skal hava stoytt spritt á eina song og tvær sofur, og skal síðani hava fest í. 

eldur í húsum á Stykkinum, eldur á Stykkinum, eldsbruni á Stykkinum, Stykkið

Eldurin festi eisini í eini grannahús. (Mynd: Bjarni Árting Rubeksen)

Festi í grannahús

Sambært ákæruritinum bíðaði maðurin inni í húsinum til eldurin logaði. 

Eldurin gjørdist so mikið stórur, at hann festi í eini grannahús. 

Bæði húsini fingu stóran skaða.

Skaðin er fyribils mettur til góðar 3,7 milliónir krónur, stendur í ákæruritinum.

Setti eld á bil

Sami maður er eisini ákærdur fyri at hava sett eld á ein bil, hetta hendi sama kvøldið, sum eldurin var á Stykkinum.

Maðurin er eisini ákærdur fyri í fleiri førum at hava rúsevni uppi á sær, at koyra bil ávirkaður av rúsevnum, og fyri innbrot og stuldur.