Hálvt annað ára fongsulsrevsing fyri neyðtøku

Ein 17 ára gamal maður hevur í Føroya rætti fingið hálvt annað ára fongsulsrevsing fyri neyðtøku. 

Ein stórur partur av fongsulsrevsingini, 12 mánaðir, er treytaður.

Í royndartíðini, sum er tvey ár, skal maðurin ikki gera nakað revsivert. 

Maðurin skal somuleiðis vera undir eftirliti av Kriminalforsorgini og Barnaverndini í allari royndartíðini.

Umhugsa at appellera

Maðurin er funnin sekur í at neyðtaka eina javnaldrandi kvinnu í Havn í apríl í fjør.

Maðurin noktar seg sekan í ákæruni. Hann umhugsar, um hann skal skjóta dómin inn fyri Eystara landsrætt.

Ákæruvaldið vildi hava mannin dømdan hálvt annað ára treytaleysa fongsulsrevsing, og umhugsar tí eisini, um dómurin skal skjótast inn fyri hægri rætt. 

Freistin at appellera er 14 dagar.

Málið kemur ikki undir lógina um, at sex krevur samtykki, tí hon kom ikki fyrr enn 1. juni í fjør.